Lalduhoma chuan, "Tunah chuan thangthar fingvar zawk in lo chhuak a, Tourism Department pawhin Tourism Sector a kalpui thiam tial tial a. Inkalpawhna kawng a lo tha ve zel bawk a. Khualzin kan hip tam ve ta tial tial mai," a ti.

Nikum chhung khan Mizoram chu hmarchhaka khualzin hipluh lama hmasawn nasa ber kan ni ta a ni. Chhinchhiah chinah khualzin nuaih nga leh singhnih (5,20,000) chuangin Mizoram an rawn tlawh a, a kum hmasa aia a punna chu 139.50% a ni. Kuminah relin Sairang a rawn thleng ta a, khualzin hi an pung hle turah kan ngai, a ti bawk.

Kan ram hi kan enkawl thiam a, kan khawtlang nun mawi tak hi kan zawrh thiam bawk chuan sum leh pai tam tak hmuh theihna leh kan hnam chawilarna remchang tak kan nei a ni. Khualzin tana tlawh nuam taka insiam thiam hi Tourism Sector-a a pawimawh lai ber a ni, CM chuan a ti.

CM chuan, khualzin rawn kal tam ber turte hi Foreigner an ni lo va, kan Indian-pui, Vai kan tihte khu an ni hlawm a. Vai rawn zin hi lo tawngpawng hlauh ngawt tur a ni lo. ILP neiin an rawn lut a, an haw a hunah an haw ve leh mai dawn a ni, a ti.

 

"Heng khualzinte hian kan ramah sum leh pai an rawn hmang a, chung chu keini tan sum lakluhna hnar an lo ni ta thin a ni. Mizoram sum hi kan thenawm state-ah a luangthla hnem tawh a. Tourism hmanga laklet dan kan dap ve a ngai a ni," a ti bawk.

Nikum Kut kha mi sing ruk chuangin an chhim niin an hria a, Kut denchhena Champhai leh a chhehvel mipuite sum lakluh tlingkhawm kha nuai sangkhat chuang niin an ngai.